Mat 26 | MMX | STEP | Se ne Iesu ga vaase axap na levempapaase, neni ga lok ti luvuttadi loklok ka anasa ren keretna,

cSak 13:7

Matthew 26

Diga Sevut Li Levelinga Ri Sev Amet Ne Iesu

(Mk 14:1-2; Lu 22-1-2; Jo 11:45-53)

1 Se ne Iesu ga vaase axap na levempapaase, neni ga lok ti luvuttadi loklok ka anasa ren keretna, 2 “Miklen i do legepu aleng move ik lok ti leluxa at Lovovolo Pe. Laaleng i auret do limixin diba song araba ia, Laradi Mevana, ri limixin esep kusu diba vaxarem ia at laxaba.”

3 Ap mo mun laaleng lavamaasa silok, la loxongkulao silok at limixin me Israel diga vot eburu to at loogu silok at lamaasa gomgo, laasen teren ne Kaiapas. 4 La diga sevut li levelinga xusu ri ranga alis ka nemnem ne Iesu la dina sev amer i. 5 Diga lok, “Ata noxo lox i na at laaleng at leluxa; lavanga limixin dina lok kaxat turube.”

Latkin Ga Soli Li Ladan Mavak To At Ne Iesu Ro Beteni

(Mk 14:3-9; Jo 12:1-8)

6 Iesu gak lok to Beteni at loogu at ne Simon; gano lanmeres gu gak lok teren. 7 La ne Iesu gat kis ti anan, la lara latkin ga vot pasa i, gap kip lubuxom avukat ^{▼▼Na lubuxom tuntu diga lox i mi luat bunbun.} ga umsu mi laxadan mavak, luunun teren ga urut aleng, la ni ga soli i ro at lavatlak at ne Iesu.

8 La luvuttadi loklok ka anasa ren diga ven i na, la diga musak, diga lok, “Tila i soli xepe gamasa i na? 9 Ni i epovo ri sesep mi na laxadan mavak kusu ni ba lok ka tuunun silok teren, la na lok tooro limixin banbalo min.”

10 Iesu gaklen pam levendoxoma atdi, kuren la ni ga lok tidi, “Nemen mita lox angtang na latkin, mila neni i lok lavanga nunuan tia. 11 Limixin banbalo mo dibat pot pasa amisik nimi xusu mibak lok tooro di, ketla nenia noxo nemen eburu amisik minimi. 12 Ni i soli na laxadan mavak at labantuxu rak kusu ri lox agagas li labantuxu rak ti lamaaut. 13 Nia a tong tuturun i rinimi do, at ua loxot at na lavatbung menemen axap limixin diba tong asu Lagale Lavavang, na lavanga neni i lox i, diba tong box i xusu limixin dibaklen i.”

Judas Ga Siam Kusu Na Song Araba Ne Iesu

(Mk 14:10-11; Lu 22:3-6)

14 Lara atnedi lasangaun mi legepura luvuttadi loklok ka anasa, laasen teren ne Judas Iskariot ga vosiga lavamaasa silok. 15 La ni ga sue di, “Do nenia na song araba ne Iesu rinimi, miba raba ia mi tavanga salai?” La diga siam do diba raba i mi lavantun sangaun pilas gamgames. 16 Ga ru ka i ap mo laaleng ne Judas ga reven ti taaleng kusu na song araba ne Iesu ridi.

Iesu Ga Anan Eburu Mi Luvuttadi Loklok Ka Anasa

(Mk 14:12-21; Lu 22:7-13,21-23; Jo 13:21-30)

17 At laaleng avot at leluxa ua diga ove vetpes lengkongkide, ^{▼▼Leluxa limixin me Judaia diga lok katling laaleng, diga vas kaxat boro Isip. La di goxo lok li laiis at lengkongkide atdi.} luvuttadi loklok ka anasa at ne Iesu diga vosiga i la diga sue i, “U vara i do mana lox agagas li laanan tidik ua?”

18 La ni ga vorang i ridi xeretna, “Mina vubeles at lemenemen silok la mina vosiga lara laradi; la mina lok tin keretna, ‘Leeme loklox ase atnama i tong i do laaleng meremet teren i auret la neni eburu mi luvuttadi loklok ka anasa ren diba lok katling Lovovolo Pe ro at loogu ram.” 19 La luvuttadi loklok ka anasa ren diga mumu asu levelinga at ne Iesu la diga lox agagas li leveluxa ri Lovovolo Pe.

20 Ga ukantinao Iesu gat kis kusu ri anan eburu mi lasangaun mi legepura luvuttadi loklok ka anasa ren. 21 Nedi diga anan la ni ga lok tidi, “Nia a tong tuturun i na rinimi. Legesara mo atnimi naba song araba ia ri limixin kapmek.”

22 La diga bulu aleng la nedi getgesara diga sue i, “Leeme Silok. Kopmen nenia, do?”

23 La ne Iesu ga vorang i ridi, “Mo lara na song arup mi lekngen eburu minia ri levempanga anan, neni naba song araba ia ri limixin kapmek. 24 Nenia, Laradi Mevana, anaba met kerekngan Lovoang Kaala i tong i, ketla naba lok kapmek aleng ti mo laradi naba song araba ia ri limixin kapmek. Giba lox avukat do nenen gitoxo visik ka i.”

25 La ne Judas, mo ga gagas kusu na song araba i, ga lok, “Rabai. Kopmen nenia, do?”

La ne Iesu ga vorang i, “Nenu vam.”

Laanan Kaala at Leeme Silok

(Mk 14:22-26; Lu 22:14-20; 1Ko 11:23-25)

26 Move diga anan la ne Iesu ga lok kaka loxongkide, ga tong avukat ti ne Moroa, ga sebex i la ga raba luvuttadi loklok ka anasa ren min la ga lok, “Mina lok kaka i na la mina anan i; labantuxu rak na.”

27 La neni ga lok kaka lakap inin, ga tong avukat ti ne Moroa, la ga raba di min la ga lok, “Nemi axap mina in at na. 28 Lada rak na la i lok katling lekabus maxat. Lada rak ba sen su xusu ri limixin buaang, ne Moroa naba doxoma xepe leveloklok kakapmek atdi. 29 Nia a tong i rinimi do nia noxo in at lavaen i ru ka i lingina se ap mo laaleng nia aba in lavaen maxat eburu minimi ro xeneng at Linintoo at ne Tamak.”

30 Digak pixan mi loxompixan, la diga vas su la diga vas kaxat uto at Lakaana Olip.

Iesu Ga Vaase Alii Do Ne Pita Naba Sok Tixirixes I

(Mk 14:27-31; Lu 22:31-34; Jo 13:36-38)

31 Melemu ne Iesu ga lok tidi, “Lingina at laxanimin, nemi axap minaba subu basinge ia; i lok ngan Lovoang Kaala i tong i xeretna,

‘Nia ne Moroa, anaba sep laradi loklok tatao at levesipsip la levesipsip at loxonbinam sipsip dinaba epeseves.’ ^c

32 Ketla melemu at laxakatu kaxat amlong tarak, nia abamgo rinimi uto Galili.”

33 La ne Pita ga lok tin, “Keke i do nedi axap dina subu basinge u, nenia xopmen tinotno noxo subu.”

34 La ne Iesu ga lok tin, “Nia a tong tuturun i ru; lingina at laxanimin laxaxak noxovisi na reng, la nenu unaba sev apkap naba vantun do uxoklen ia.”

35 La ne Pita ga vaase lolos tin keretna, “Do dina lok do dina sev amer ia, nenia noxo sok tixirixes u.” La luvuttadi loklok ka anasa axap diga tong box i xuren.

Iesu Ga Ngising To Getesemane

(Mk 14:32-42; Lu 22:39-46)

36 Melemu ne Iesu gat pas uto at lara loxot, laasen teren Getesemane. Luvuttadi loklok ka anasa ren diga emu min, diga rupot la ni ga lok tidi, “Mina xis de. Anat pas lixilik uto xusu ana lok lising.” 37 La ni ga lam ka ne Pita mi lumdak at ne Sebedi, la lainbulu silok ga suxuna lorooro ren. 38 La ni ga lok tidi, “Lorooro rak i umsu mi lainbulu silok mo na lox amer ia. Minak lok de la mina kuxut tooro ia.”

39 La ne Iesu ga vas silatla xakalik, la ni ga subu midi mi lumeren uto xopok at laxangka la ga sing ne Moroa xeretna, “Tamak. Kereva, i epovo do una lok pes na lumumuat basinge ia? Ketla nemen gat uta mumu asu lavavara rak, una mu asu lavavara ram.”

40 La ne Iesu gamlong saparap luvuttadi loklok ka anasa ren la ga long lenget ka di, diga unga. La ni ga lok ti ne Pita, “Kereva, mixo epovo nap kip na lumumuat eburu minia at loxonaleng lixilik mun? 41 Mina reven tatao la mina ngising kusu mi noxo subu at loklok tong pen. Loroonan at laradi i epovo ri ronga res, ketla labantuxu ren i molos.”

42 La ne Iesu ga vas silatla xakalik ga sev agepura la ga sing, “Tamak. Do ixo epovo una lok pes na lumumuat basinge ia se nia ana lox epovo i, i lox avukat; ana mu asu mun lavavara ram.”

43 Iesu gamlong uto at luvuttadi loklok ka anasa ren la ga long lenget ka di, diga unga manga, mila lemeren di ga unga. 44 La ni ga ke di la ga vas kaxat basinge di ga sev avantun kusu na sing; la ga sing amu mi nom levelinga ni ga ngising pam min.

45 Melemu ni gamlong uto at luvuttadi loklok ka anasa ren la ga lok tidi, “Kereva, move mi unga? Pen ba i nom. Loxonaleng i auret do lara laradi na song araba ia, Laradi Mevana, ri limixin bilinga. 46 Mina xatu. Ata vas tangarang na laradi boro it pas kusu nam taba minia ri limixin kapmek.”

Diga Ranga Alis Ne Iesu

(Mk 14:43-50; Lu 22:47-53; Jo 18:3-12)

47 Iesu move ga paase la ne Judas ga rupot. Neni lara at lasangaun mi legepura luvuttadi loklok ka anasa at ne Iesu. Buaang limixin diga emu min, digap kip levemparise sepsep la levempukup sepsep. Lavamaasa silok la loxongkulao silok at limixin me Israel diga riki di. 48 Avot ti na, ne Judas ga tong li loklok katling kusu diba ven kibis ne Iesu. Judas ga lok tidi, “Mo lara, nia aba nes i, neni vam ne Iesu. Mina ranga alis i.” 49 La soso mun ne Judas ga vas saparap ne Iesu la ga lok, “Laxanimin avukat, Rabai.” La ni ga nes i.

50 La ne Iesu ga lok tin, “Lentangas tarak. Una lok soso nom lavanga u vara i do una lox i.”

La mo limixin diga vosiga ne Iesu la diga ranga alis i. 51 Lara at luvuttadi loklok ka anasa ren ga ven i na la ga rev asu lavarise sepsep teren la ga sep korop kepe labaalung at lasaxaruki at lamaasa gomgo.

52 La ne Iesu ga lok tin, “Lok li amlong lavarise sepsep taram mila nedi di sep limixin mi lemparise, diba met kuren. 53 Nenia a epovo ana ro ri ne Tamak la neni ba raba ia mi lubung angelo, luutus atdi ba volo lavanuti sangaun mi legepura larabin sangsangaun kobot (72,000) lubung angelo. 54 Ketla keke nga di mila nia aba lox asorun mo levengkot at Lovoang Kaala i tong asu i do na lavanga naba vot.”

55 Ap mo loxonaleng ne Iesu ga lok ti mo limixin, “Tila mi vot de mi levemparise sepsep la levempukup sepsep kusu mina ranga alis ia? Nenia xopmen ana vaxaru kaxat ka teesep. Buaang levenaleng nia agat kis to xeneng at loogu laplavang kusu ana anasa limixin, ketla nemi xopmen mi goxo ranga alis ka be ia go. 56 Na levempanga i ravasu keretna xusu na lox asorun levenmamalagan at lavaeme vapaase alii.” La luvuttadi loklok ka anasa ren diga sixiro axap.

Iesu Ga Tu Ro Melamgo At Luvuttadi Amgomgo at Leme Israel

(Mk 14:53-65; Lu 22:54-55,63-71; Jo 18:13-14,19-24)

57 Nedi diga ranga alis ne Iesu, diga lam ka i uto at ne Kaiapas, lamaasa gomgo; go luvuttadi loklox ase at Lenavolo la loxongkulao silok diga rupot pam. 58 Pita ga mumu asu ne Iesu ro xa vaxalom la ga rupot saparap loogu at lamaasa gomgo la ga vubeles at lemelua. Ni ga xis kopok eburu mi luvuttadi rutu mu xusu na ven lavanga salai naba vot saparap ne Iesu.

59 Nedi axap luvuttadi amgomgo eburu mi lavamaasa silok ap mo lixitkis buru diga puse ri tevelinga xaxarang kusu dina so raba ne Iesu min la diba epovo na sev amer i. 60 Ketla di goxo epovo, keke do buaang luvuttadi diga vot kusu dina tong asu tevelinga xaxarang.

At laxavaxap, legepu radi duga vot, 61 la duga lok, “Na laradi ga lok keretna, ‘Nenia a epovo na sele utut kepe na loogu laplavang at ne Moroa la anaba vaxaru amu box i xeneng at lavantun aleng.’”

62 La lamaasa gomgo ga xatu la ga lok ti ne Iesu, “Ua lavasuun teren la uxo vaase? Kereva, u xopara na vorang na levelinga di sok taba u min.” 63 Ketla ne Iesu kopmen goxo tong toxolinga.

La lamaasa gomgo ga lok tin, “At laasen at ne Moroa i rooro amisik, una tong i rinama. Kereva, nenu Lanarong, Nitna ne Moroa?”

64 La ne Iesu ga lok, “I ruturun, nenia vam. Ketla nia a tong i rinimi. Melemu minaba ven ia, Laradi Mevana, anabat kis saparap lekngen tino ne Moroa i lolos aleng, la anaba vot at loxontakabu boro vana at laxalibet.”

65 La lamaasa gomgo ga lais korop lavanga singsiga ren la ga lok, “I paase vupu ri ne Moroa. I xap ta lavapaase. Mira ronga vam levelinga ren. 66 Kereva levendoxoma atnimi?”

La diga vorang i xeretna, “I epovo do neni na met.”

67 La diga vubis abuxumin lemeren la diga tit pupu i, la lentaba diga pasa i mi levengkikngen di. 68 Digak lok, “Do nenu Lanarong, una tong kisip ka i do nege i sev u.”

Pita Ga Sev Apkap At Ne Iesu

(Mk 14:66-72; Lu 22:56-62; Jo 18:15-18,25-27)

69 Pita gat kis to xamang at lemelua la lara loolik, neni lasaxaruki ga vosiga ne Pita la ga lok, “Nenu bok gak lox eburu mi ne Iesu boro Galili.”

70 Ketla neni ga sev apkap to melamgo atnedi axap, ni ga lok, “Nia xopmen naklen lavanga salai u paase min.”

71 La ni gat pas uto at langas povolo la lara loolik bok ga ven i la ga vaase ri limixin diga tu go. Neni ga lok keretna, “Na laradi gak lox eburu mi ne Iesu boro Nasaret.”

72 La ne Pita ga sev apkap manga la ga vangpe, ni ga lok, “Nia xopmen anaklen nom laradi.”

73 Melemu lixilik mo limixin diga tu go, diga vosiga ne Pita la diga lok, “I ruturun do nenu lara atdi mila lavapaase ram i lok ngan laradi boro Galili.”

74 La ni ga vangpe mi levelinga vangpangpe xeretna, “Levelinga rak i ruturun; do xopmen, ne Moroa naba lox asongor ia. Nia axoklen mo laradi.”

La soso mun laxaxak ga reng. 75 La ne Pita ga doma su at levelinga at ne Iesu ga lok keretna, “Laxaxak kovisi noxo reng, la nenu uba sev apkap naba vantun do uxoklen ia.” La neni ga vas su ukamang la gang teng aleng.